पर्वहरु साझा बन्दै जानु विविधतायुक्त समाजका लागि सुखद विषयः मुख्यमन्त्री

बुटवल, श्रावण २७
मुख्यमन्त्री शंकर पोखरेलले इस्लाम धर्मावलम्बीहरुको महान पर्व ईदउल अजाहा (बकर इद) पर्वको अवसरमा समस्त स्वदेश तथा विदेशमा रहनुभएका इस्लाम समुदायका दाजुभाइ दिदीबहिनीहरुमा हार्दिक शुभकामना व्यक्त गर्नुभएको छ ।
विभिन्न जाति र समुदायका पर्व र उत्सवले हाम्रो मुलुक रंगिएको छ । कुनै जाति विशेषले मनाउने पर्व र उत्सव अहिले सबैका साझा पर्व भएका छन् । सुमदाय विशेषका पर्व साझा बन्दै जानु विविधतायुक्त समाजका लागि सुखद विषय हो भन्दै मुख्यमन्त्रीले सामाजिक सद्भाव, भातृत्व र मेलमिलापको वातावरण बनाएर मुलुकलाई एकताको मालामा बाँध्न यी पर्वले महत्वपूर्ण भूमिका खेलेको वताउनुभएको छ । बकर इदले पनि सद्भाव र भाइचारा बढाउन महत्वपूर्ण भूमिका खेल्दै आएको छ । बकर इदको सांस्कृतिक महत्व र यसले दिने सन्देशलाई समाजमा प्रवाह गरी नेपाली समाजमा एकता, सद्भाव र  मेलमिलाप अझै बढाउन आवश्यक छ, उहाँले भन्नुभएको छ । 
विज्ञप्तिमा भनिएको छ– संघीय लोकतान्त्रिक गणतन्त्र नेपालको संविधानले सबै जात—जाति र समुदायको उत्थान र विकासको लागि ढोका खोलेको छ । अल्पसंख्यक मुस्लिम समुदायको उत्थान र विकासका लागि पनि संविधानमा आवश्यक प्रबन्ध गरिएको छ । संवैधानिक रुपमै मुस्लिम आयोगको गठन गर्ने व्यवस्थाले मुस्लिम समुदायप्रति सम्मान व्यक्त भएकोे छ । तीन तहको चुनाव सम्पन्न भएपछि मुलुकमा संविधान कार्यान्वयनको व्यवहारिक अभ्यास भइरहेको छ । संविधानको कार्यान्वयन हुँदै जाँदा सबै समुदाय, वर्ग र जातिले व्यवहारिक रुपमा प्राप्त अधिकारको उपभोग गर्दै जाने वातावरण तयार हुने छ । सबैले अधिकारको व्यवहारिक रुपमा उपभोग गर्न पाउँदा लोकतान्त्रिक शासन व्यवस्थाप्रति अपनत्व महशुस हुने वातावरण बन्नेछ ।