उपसभामुखले शर्त अस्वीकार गरेपछि महराले दोस्रो राजीनामा दिए

काठमाडौं,असोज १५ । उपसभामुख शिवमाया तुम्बाहाम्फेले राजीनामाको भाषामा असहमति प्रकट गरेपछि निवर्तमान सभामुख कृष्णबहादुर महराले दोस्रो पत्र बुझाएका छन् ।

मङ्गलबार महराले छानबीन प्रक्रिया नसकिँदासम्मका लागि भन्ने शर्त राखी राजीनामा पत्र दिएका थिए । सो पत्र प्रमुख स्वकीय सचिव सागर केसीमार्फत उपसभामुख तुम्बाहाम्फेलाई पत्र बुझाएका थिए ।

 उपसभामुख तुम्बाहाम्फेले भाषा अस्वीकार गरेका कारण   संसद् सचिवालयलाई सूचना टाँस गर्नसमेत निर्देशन दिएकी थिइनन् ।

बुधबार भाषा सच्चिएर आएरपछि सूचना टाँस गरिएको हो । दोस्रो राजीनामा पत्रमा नैतिकताका आधारमा आजकै मितिदेखि राजीनामा दिएको छु’ भन्ने बेहोराको पत्र आएपछि स्वतः राजीनामा स्वीकृत भएको छ । 

संसद् सचिवालयले टाँस गरेको सूचनामा पनि राजीनामाको सोही भाषा उल्लेख छ ।