बुटवलमा अत्याधुनिक सभाहल तथा प्रदर्शनी केन्द्रका लागि बोलपत्र आह्वान

–छ महिनामा प्रक्रिया सक्ने
–सुरु भएको २७ महिनामा निर्माण पूरा हुने लक्ष्य
–डेढ अर्बको लागत अनुमान
–३५० देखि ४०० स्टल राख्न मिल्ने
अमृत गिरी
बुटवल, असार १४ । पाँच नम्बर प्रदेशको राजधानी बुटवलको मुहार फेरिने गरी अर्को नयाँ कामको सुरुआत भएको छ । भौतिक पूर्वाधार विकासमा तीव्र फड्को मार्दै आएको बुटवलमा अत्याधुनिक सभाहल तथा प्रदर्शनी केन्द्र बन्ने प्रक्रियाको औपचारिक थालनी भएको छ । 
बुटवल उप–महानगरपालिका– १०, रामनगर स्थित बुटवल मण्डपमा प्रस्तावित अन्तर्राष्ट्रीय स्तरको उच्च प्रबिधियुक्त ‘बुटवल प्रदर्शनी केन्द्र’ निर्माणका लागि मंगलबार ग्लोबल टेण्डर आब्हान भएको छ ।
नेपाल सरकारको सहरी विकास मन्त्रालय, सहरी विकास र भवन निर्माण विभाग अन्तर्गतको बुटवल सभाहल तथा प्रदर्शनी केन्द्र निर्माण कार्यान्वयन इकाइले बोलपत्र आह्वान गरेको हो । छ महिना भित्रमा बोलपत्रको प्रक्रिया सक्ने गरी काम सुरु गरिएको परियोजना प्रमुख शिखर लामाले जानकारी दिनुभयो । सुरु भएको २७ महिनामै यस्को निर्माण कार्य पूरा गर्ने लक्ष्य लिइएको प्रमुख लामाले जानकारी दिनुभयो ।
यस्तो डिजाइन भएको छ प्रदर्शनी केन्द्रको
बुटवलको राजमार्ग चौराहबाट पूर्वपट्टि रहेको बुटवल मण्डपको कुल जग्गा साढे १६ बिघा रहेको छ । यहीँ जग्गामा अन्तर्राष्ट्रिय सम्मेलन केन्द्र र प्रदर्शनी स्थल बन्न लागेको हो । साढे १० बिघा क्षेत्रफलमा अहिले अन्तर्राष्ट्रिय प्रदर्शनी स्थल (सभाहल) निर्माणको काम चलिरहेको छ । आकासबाट हेर्दा नेपाली राष्ट्रिय झण्डा आकारमा यो प्रदर्शनी स्थलको निर्माण हुने छ । मण्डपमै रहेको बाँकी ६ बिघा क्षेत्रमा व्यवस्थित प्रदर्शनी केन्द्र बनाइने छ । 
एक अर्ब ५० करोड भन्दा बढी लागत अनुमान गरिएको यो प्रदर्शनी स्थल मुलुककै नमुना हुने छ । बुटवल मण्डपमा बन्ने यो सभाहल तथा प्रदर्शनी केन्द्र मुलुककै ठूलो र आकर्षक हुने दाबी गरिएको छ । यस्को प्रदर्शनी केन्द्रमै हरियालीसहितका चिल्डेन पार्क, आधुनिक मिटिङ हल, व्यवस्थित पार्किङ क्षेत्रसहित हरियालीयुक्त वातावरणका पेवेलियनहरु तयार पारिनेछन् ।
प्रदर्शनीका लागि ट्रस्ट सिस्टमको ठूलो हलमा १२ हजार स्क्वायर मिटरमा प्रदर्शनी गर्न मिल्ने गरी मूल स्थलको डिजाइन गरिएको छ । यहाँ तीन सय ५० देखि चार सय वटा सम्म स्टलहरु राख्न मिल्ने छ । स्टाण्डर्ड खालका स्टलहरुलाई आवश्यक परेका बखतमा घटाउन÷बढाउन मिल्नेगरी डिजाइन गरिएको छ ।

खुला स्थानमा ठूला–ठूला उपकरणहरुको छुट्टै प्रदर्शनी गराइने छ । त्यहाँ डोजर, लोडर, गाडीलगायतका साधनहरुको प्रदर्शनी हुने छ । यस्तै तीन सय ५० र दुई सय ५० स्क्वायर मिटरका दुई वटा ठूला मिटिङ हल पनि बन्ने छन् । तीन सय ५० स्क्वायर मिटरमै व्यवस्थित भोजनालय बन्ने छ । 
प्रदर्शनी स्थलमा पाँच सय स्क्वायर मिटरमा आकर्षक हरियालीसहितको बाल उधान बन्ने छ । मण्डप परिसरमा रहेको गणतन्त्र स्मारकलाई स्थानन्तरण गरेर थप आकर्षक क्षेत्रमा सार्ने गरी डिजाइन गरिएका आयोजना प्रमुख लामाको भनाइ छ । स्तम्भका लागि छुट्टै पोखरी निर्माण गरेर दीपसहितको स्थानमा सारिने छ ।
नेकपाका महासचिव विष्णुप्रसाद पौडेलको अर्को ड्रिम प्रोजेक्ट हो यो । पौडेल अर्थमन्त्री बनेका बेलामा यस्तै ड्रिम प्रोजेक्टका लागि सबैभन्दा धेरै बजेट रुपन्देहीकै लागि विनियोजन गर्नुभएको थियो । बुटवलमा अन्तर्राष्ट्रिय सम्मेलन केन्द्र र प्रदर्शनी केन्द्रलगायतको निर्माणको संकल्प उतिबेलै गुर्नभएको थियो । लुम्बिनीलाई केन्द्रमा राखेर यस क्षेत्रलाई विकासको रोलमोडल बनाउने उहाँको संकल्प हो । 
बुटवल उप–महानगरपालिका प्रमुख शिवराज सुवेदीले प्रदर्शनी केन्द्र निर्माणको बोलपत्र आह्वानको औपचारिक प्रक्रियाले आफुहरु खुशी भएको बताउनुभयो । बुटवलका लागि अर्को गौरवको विषय थपिएको उल्लेख गर्दै प्रमुख सुवेदीले तोकिएको समयमै निर्माण कार्य सम्पन्न होस् भन्ने आम बुटवलबासीको चाहना रहेको बताउनुभयो । ‘बुटवल अर्थात् बुद्धबल्लीलाई मुलुककै प्रमुख केन्द्रका रुपमा विकास गर्ने अभियान स्वरुप अर्को नयाँ कामको थालनीले बुटवलबासी सबैलाई खुशी बनाएको छ यो तोकेको समयमै पूरा होस्’ प्रमुख सुवेदीको भनाइ छ ।
सहकार्य गर्छौं तोकेको समयमै काम पूरा होस् ः निजी क्षेत्र
यहाँका निजी क्षेत्रका अगुवाहरुले सहकार्य गर्न तयार रहेको भन्दै तोकिएको समयमै निर्माण कार्य सम्पन्न होस् भन्ने चाहना राखेका छन् । बुटवल मण्डपमा अस्थायी संरचना बनाएर प्रदर्शनी तथा मेला महोत्सव सञ्चालन हुँदा लाखौं रकम खेर गइरहेको भन्दै उनीहरुले अब व्यवस्थित प्रदर्शनी केन्द्र बन्ने भएपछि खुशी लागेको प्रतिक्रिया दिएका छन् । उद्योग बाणिज्य संघ बुटवल, रुपन्देही उद्योग संघ, रुपन्देही व्यापार संघ तथा उद्योग व्यापार संगठनलगायतका संस्थाहरुले यहाँ अस्थायी संरचना निर्माण गर्दै वर्षेनी मेला महोत्सव गर्दै आएका थिए । 
उद्योग बाणिज्य संघका अध्यक्ष खेमबहादुर हमालले अन्तर्राष्ट्रिय प्रदर्शनी स्थलले आर्थिक सबलीकरणमासमेत मद्दत पुग्ने विश्वास व्यक्त गरे । उनले समयमै काम सम्पन्न गर्ने र गराउनेतर्फ ध्यान दिन जरुरी रहेको बताए । 
अब व्यवस्थित प्रदर्शनी केन्द्र बन्ने भएपछि यीनै संस्थाहरु अहिले खुशी बनेका छन् । उद्योग संघका अध्यक्ष गणेश अधिकारीले प्रक्रिया सुरु हुनु खुशीको कुरा रहेको भन्दै ग्लोबल टेण्डरमा सामेल हुने कम्पनीलाई अग्रीम शुभकामना दिए ।
यस्तै रुपन्देही व्यापार संघका अध्यक्ष पदम श्रेष्ठले बुटवलम व्यवस्थित प्रदर्शनी केन्द्रको खाँचो रहेका बेलामा सुरु भएको प्रक्रियाले उत्साह जागेको बताए । उनले समयमै काम सम्पन्न नहुने रोगको भने अन्त्य हुन जरुरी रहेको बताए ।